سلام  عزیز دوستلار

بایرام یولدادی،اگر بازارا چیخساز بونی کامل حس ائدرسیز چون،بایرامین خریدلری باشلائیب  و جماعتی حرکته گتیریب، هرکس اوزونه و اوشاغینا تازا وسائل آلماخدادی و بو باهالیخدا کاسیب جماعت دن احوال بولن یوخدی.

دونن عزیز دوستوم یوسف پور عظیم شوطی بیر گوزل شعر گوندریب کی بی مناسبت بو گونلرینن دئیل.الی آغریماسین کی گوزل ودرین نظری وار. ای کاش هامیمیزین بو مسائله خصوصا بو گونلرده دیقتیمیز اولسون.

http://shutdudadash.blogfa.com  

آي كاسيبليق عهدوپيمان قيامت

كاش جيبيمده بيرگون پارا اولاردي
شاد گئده رديم ائوده صفا اولاردي
هئي ده ن چيكيب آديم آغا اولاردي
آي كاسيبليق عهد و پيمان قيامت

گوءن باشماقي پـــولـلو گئييب دولانير
رئزين باشماق كاسيب گئييب يوللانير
پوللولاري نييه هــاممـي تـئـزتــانـير
آي كاسيبليق عهدو پيمان قيامت

كــوپـن الــده دوروب صفـده نـوبته
عاملينن پـــولــلـو كئچـيب صوحبته
بولحظه ده ن كاسيب دوشوب ذللته
آي كاسيبليق عهدو پيمان قيامت

شيرين چاي دي سحر غذا كاسيبا
آسپريــنــدي فـقـط داوا  كـاسيبا
الله اوزو وئـرسـيـن شـفـا كـاسيبا
آي كاسيبليق عهدوپيمان قيامت

اون كوره گه يئددي ساعت صفده دي
پوللوكوره ك آليب گئديب كئيفده دي
ناهار آخشام پوللو يئيه ن كــوفته دي
آي كاسيبليق عهدو پيمان قيامت

پوللوآليرگوءزه ل گوءزه ل دونلاري
دوءشججــه يـه ســاليرتميزيونلاري
اوتو له نير گــونــده كُتو شالواري
آي كاسيبليق عهدو پيمان قيامت

پولسوز آلير خيرخيم تكين پانبيقي
قوءلبوءيونا سالير فقط مـيـنجيقي
يئرين داشي اولوب اوشاق شيققيقي
آي كاسيبليق عهدوپيمان قيامت

تـــازه لـبـاس گـورمه در هيچ اندامي
اتسيز آبگوشت اولدو گونده هرشامي
لامپائيله گئچدي هر گون آخشامــي
آي كاسيبليق عهدوپيمان قيامت